A nêutte de Natale...

L'ëa de nêutte freidu e scûo,
tiava u ventu ciù a nù dî,
zà da neive n'ea vegnuo,
e ne voeiva ancun vegnî.

In ta stalla s'ean retiæ
i pastui pe nù sentî
quellu freidu, e lì accueghæ
cumensavan a durmî.

Intra drentu tutt'assemme
un che u lûxe cumme u Sü:
Currî, u dixe, a Betelemme
perchè l’è nasciuo u Segnû.

Quelli mezi addurmigiæ

stavan lì cumme minciuin,

ma un ciù vegiu : sei alluæ,
u ghe dixe, o sei pötruin ?

Fitu, allun, sâtæ sciù in pë
piggia u læte tì Beppin
u furmaggiu, Bertumê,
unn-a pegua tì Tugnin;

Tì Battista, da u cumpâ,
e tì Giuan vanni dä muäe,
Luensu ti da-a madunâ,
avvisæli,e camminæ ;

che nüi ätri intantu annemmu
a truvä questu Segnû,
questa roba ghe purtëmmu,
e de l'atru purtian lû.

Ditu questu, u s'incamminna.
lê cu i atri, zù ä cianûa,
nè dan mente au ventu a ä brinna,
a nuttuann-a freida e scûa.

Doppu fætu du cammin,
dä luntan veddan luxï,
e di canti cun di sonni
da lì a un pö ghe pà sentî.

Van ciù lesti, ä fin arrivan
a unn-a stalla dirrucä.
Gh’ea de nuvie che a cruvivan
e gh’ea i Angei li a cantä.

In ta groêuppia gh’ea u Bambin,
Gh’ea.....ma cose staggu a dï ?
Se un Presepiu ammiæ un pittin,
megiu assæ purriei capî.

Gh’ea u Nicolla u sciancabrasse

cun due pulle appeisa a-e brasse

Gh’ea u Beneitu da Cà Gianca

Gh’ea u Baciccia, queu da Franca

Gh’ea u Bastian cun unn-a gallina

cun de gee e unn-a furmaggina

Gh’ea Luensin cu-e braghe neue

e a marscinn-a a quattru roue

Gh’ea a Manena da beccassa

cun in testa unn-a fugassa

Gh’ea u garzun du cuntamicce

cun dui chilli de sasisse

Gh’ea u Carlin du funtanin

cu rabellava un’agnellin.

Axi, vacche, donne, ommi

da ogni parte l’è arrivou

Chi portava furmagette

cumbi, turdi, faxianetti,

lete, euve belle fresche

e chi crave e chi agneletti.

Gh’ea i Pastuî, che pe u Segnû
n'ean avari, nè pötruin;
e pe faghe festa e önu
coran tutti, grammi e buin.

E u Bambin, pe u nostru ben
fäse povou ghe piaxiûo.
e figgeû in t'un pö de fen
pe nuì atri u l'è vegnûo.