" Questo breviscimo racconto do pàise dovve son nasciùo,
faeto un po' a-a spedìa con troppi sbagli ('na votta
se dìva "àri") e de imprecisioin, a no l'ha a pretèisa
d'èse n'opera storica, ma a veu èse solo 'n appunto
pe' i nostri cài zoeni d'ancheu che fòscia de Pontedèximo
ne san ciù ninte che poco.
Grassie a chi ghe daià n'euggià.


Se sa d'un ponte arsòu con maestria
che da-o Borgo o passava in sce dui riae,
do decimo segnà, 'na grossa prìa
ch'a marcava a distansa da-a cittae.


Nascèiva lì o Ponceivia insemme a-o nomme
do nostro Pontedeximo do quae,
se mi ne saiò bon, pe' quante e comme,
vorriae umilmente chì parlàve assae.


O pàise o l'àiva allòa poche risorse
e o l'èa 'n posto dovve se cangiava
càri e cavalli e repiggiava e forse
a gente che spedìa de chì a passava.


Poco ciù de cent'anni avanti Cristo,
con e so armae, Aulo Postumio Albin
o l'ha trassòu 'na stradda c'ha l'ha visto
passà a gente da Zena a l'Appennin.

 

Ma di romani ve dìò poco e ninte
e Zenaa l'èà alleà di imperatoì;
a parte e guaere, quaexi tutte vinte,
se continuava a lottà, vive e moì.


Là sorva, in scià collinn-a do Perdon,
gh'èa 'n castello; a gente a fàva a botte
e, fra 'na lite e 'na rivolussion,
l'han distrùto e rifaeto due o trae votte.

 

Fra barbari, crociati, manaman
crescèiva intanto o nostro pàise adaxo;
verso a-a fin do trexento, a San Ceprian
gh'èa 'na gexetta; autentico, veàxo! ( veritiero )

 

Nasceiva gente. Poco doppo o mille,
Pontedeximo o l'ha 'na gexa. Appreuvo,
za' organizzae fra "vici", "pagi", ville,
se fà 'n òtòio; o pàise o sa de neuvo.

 

Poi han faeto i "Comuni" e han portòu
i Consoli da plebe a comandà,
poi un Poistae da Zena nominòu
e un Capitanio ch'o stesse in vallà.

 

E torna guaere, famme, rexistensa;
i Spinola no lascian ninte intrego,
o Ducca de Milan, sensa passiensa,
o stronca a ribellion; 'n àtro renègo!

 

Saccheggian tutto Guelfi e Ghibellin,
(a vegnì vègio chì nisciun ghe a fa)
quello che treuvan in scìò sò cammin.
O Medio Evo intanto, adaxo o va.

 

Vègne i franceixi; calan da Busalla
a mette a faero e feugo anche e frassioin
con a potensa e a forsa de 'na balla
da scceuppo e armi contra di forcoin.

 

Intanto chì in to Borgo vègne arsòu
un convento pe' fratti cappuccin
che da allòa han sempre aggiuttòu
i pòvei, i marotti e i meschin.

 

Continuan e beghe e o pàise o ne risente;
fra Fieschi, Dòia, Spinola e Adorno,
chi ammassa, chi se vendica; se sente
quante l'è brutto vive chi dintorno.

 

Pe' tutti questi faeti de violense,
Pontedeximo o l'è sempre a combatte
vescovi,dogi, famme, pestilense...
o nostro pàise o n'ha pagòu e patte. (lo scotto)

 

Vaggo de corsa. I storici han zà scrìto
e ben e tanto de nostre vicende,
però me piaxe che chì segge dito
che a nostra gente a lotta e a no s'arrende.


Da tempo l'èa finìo n'opera sanna

che i Sereniscimi àivan stabilìo:

a stradda da Bocchetta pe' a Padann-a

ch'a l'ha creòu o benessere chi in gìo.


Poi l'invaxon di austriaci accampae

into Ponceivia, ma gh'è chi convince

a-a ribellion i nostri ammagonae:

o l'è un balletta con o sò: " Che l'ince? "


Va o nemigo, ma o ritorna drìto

doppo trei meixi a semenà terrò

in te taere occupae; s'accorzan fìto

de quante o Botta Adorno o l'èa impostò..


Intanto chì into Borgo 'na figgetta

da-a famiggia di Ghersi a l'èa nasciùa

pè diventà 'na suora, maddre eletta

a Gubbio fra e Clarisse inta clausùa.


Comme un fulmine poi a l'orizzonte

sponta Napoleon pin de preteise.

... Guaere e solo a forsa pà ch'a conte

e chì se fa a Repubblica Zeneise.


Sensa tanta anscietae de fa peccòu,

comm'anche i àtri, o nostro convento

con ordini precisi o vèn serròu,

lasciando fratti e a gente into sgomento.


"O Blocco" o porta puia e famme a Zena,

a pà no finì mai quest'odissea;

poi firma a reisa o general Massena

e torna tutto, o quaexi, comm'o l'èa.


Tanto, sempre a propoxito de strae,

do vintun, comme 'n seunno, pà che spunte,

gh'e un gran travaggio in te nostre contrae,

quella di Zuvi fra Zena e Piemonte.

 

Parlemmo un pò de scheua; zà finn-a verso

i primmi anni do millesettecento,

i Cappuccin, de badda e a tempo perso,

davan a tutti quarche insegnamento.


Poi do cinquanta, in gexa e in te  l'òtòio,

mostravan italian, lengua latinn-a;

con e lessioin un pò de refettòio,

naturalmente inseme co-a dottrinn-a.


E funzionava, into novantadui,

'na scheua pè pòvei gestìa da-i prelati

affinchè tutti avessan da capì

e, pe' fortunn-a,  a l'èa faeta a grati.


Solo inte l'ottocento e ben puntuali,

into sciusciantaquattro, e no è mai troppo,

han faeto e primme classi comunali,

poi daete a-e suore ch'èan vegnuae 'n pò doppo.


Sciusciantasette: l'è nasciùo l'Asilo,

veddeiva a luxe e Societae Operaie,

l'Orfanotrofio e, ho piaxèi de dìlo,

o Ricreatorio e gran vitta sociale.


Fra tutti quelli ch'han arsòu a testa,

a solidarietae a no se perde;

nasce, vosciùa da tutt'a gente onesta,

do neuvecentoeutto, a Croxe Verde.


Sccieuppa a guaera mondiale, brutta tappa;

a ciù bella zoentù a se ne va via;

o Carso, Caporetto, Montegrappa

e poi o Piave...a paxe...e a l'è finìa.


Repiggia a vitta, ma s'ha sempre in mente

i arregordi fin troppo recenti

e da-e popolassioin preuvae, ma attente,

nasce, pe' i morti eroi, i monumenti.

 

E, doppo tante còse negative,

fra un rifiorì d'officinn-e e ferrèe,

ritorna inta valladda a coae de vive,

gh'è travaggio pe' tutti e tante idèe.


Subito doppo a guaera, pe' curà

gratuitamente i sò concittadin,

s'è faeto a Pontedeximo l'uspià

pe' merito e voentae d' Andrea Gallin.


Ma 'na segonda guaera, do quaranta,

a fà tornà magon, lagrime in scena;

arriva i tedeschi e, sensa tanta

pietae, piggian l'Italia e anche Zena.


Pe' mette fin a-a situassion amàa,

s'è faeto a lotta de liberassion;

i nostri zoeni l'han pagà ben càa;

ha daeto un contributo ogni frassion.


Cerchae de no ascordàli; en staeti eroi,

han rifaeto' na patria derelitta,

son morti pe' noiàtri tutti e poi

èan mae amixi, ghe piaxèiva a vitta.


vorriae fermàme chì, anche da-o momento

che ognun vive o so tempo comme peu,

che quant'ho dito o no fìse 'n tormento

ma avesci e ve sentisci drento a-o cheu


paxe, salute e ninte maottiae, ( malattie )

tanta serenitae, ricchessa e amò,

che tutte e incomprenscioin fìsan finìe

e avesci coae de ringrassià o Segnò.


Tonino